O socialismo ourensán refórzase en Allariz cunha nova agrupación local
O PSdeG-PSOE de Ourense acaba de formalizar a constitución da súa nova agrupación local en Allariz co propósito de reforzar e impulsar o proxecto socialista no municipio, ademais de continuar construíndo un plan “fuerte, sólido e estable” que mellore os resultados electorais e aumente o apoio cidadán de cara ás eleccións municipais de 2027.
A Executiva Provincial do PSdeG-PSOE subliña que esta nova agrupación «vén a refrendar a nosa idea de seguir incrementando a capacidade da organización de municipio a municipio, fortalecendo o partido e implementando o proxecto en todo o territorio». Ademais, destacan que «estamos ante un proxecto sólido, con futuro e en continuo crecemento», impulsado polo auge e consolidación dos socialistas en Allariz.
Na primeira reunión, Elena Peaguda Domínguez, actual portavoz do PSdeG-PSOE no municipio, foi elixida secretaria local; Miguel Castro García asumirá a secretaría de organización e Manuela Vila Álvarez encargarase da secretaría de política municipal. A agrupación conta actualmente con seis membros e traballa para incorporar novas persoas que desexen sumarse a un proxecto en expansión e con crecente respaldo na comunidade local.