O Tai-Jitsu Ourense e o Ximnasio Estudio A Valenzá representaron a Ourense nun congreso nacional da Federación Española de Karate
Os clubs ourensáns Tai-Jitsu Ourense e Ximnasio Estudio A Valenzá estiveron presentes no primeiro congreso nacional de disciplinas asociadas da Real Federación Española de Karate, celebrado estes días na Academia de Infantería de Toledo.
Ata alí desprazáronse os monitores Francisco Javier Molina e José Manuel Fernández, que participaron nun encontro que reuniu a preto dun cento de asistentes procedentes de distintos puntos de España.
O congreso estivo centrado na defensa persoal e permitiu compartir coñecementos en diferentes disciplinas asociadas, como Goshin, Nihon Tai-Jitsu, autodefensa para a muller, Kung-Fu e combate corpo a corpo. Ademais, contou coa presenza dos responsables nacionais destas modalidades.
Durante as xornadas tamén se levaron a cabo exhibicións das distintas disciplinas e un coloquio cos mestres e directores dos departamentos participantes. Como peche, a organización ofreceu unha visita guiada polas instalacións da Academia de Infantería de Toledo.