O TSXG ratifica a condena a Jácome por quitarlle a palabra á voceira socialista nun pleno
O Tribunal Superior de Xustiza de Galicia (TSXG) vén de desestimar o recurso de apelación ao Concello de Ourense e confirmar a sentenza pola cal se condenaba ao alcalde, Gonzalo Pérez Jácome, por vulnerar os dereitos fundamentais da portavoz do grupo municipal socialista, Natalia González Benéitez, e quitarlle a palabra durante unha sesión plenaria.
Así as cousas, condénase ao rexedor, tal e como recollía a sentenza despois da primeira vista xudicial, a publicar o ditame na web do Concello, con acceso público á mesma, á súa lectura íntegra no primeiro pleno que se celebre tralo fallo e ao pago de 1.000 euros que terá que aboar a Administración demandada polas costas procesais.
Argumentábase no veredicto inicial, agora apoiado polo TSXG, que as interrupcións continuas impiden non só o debate sosegado que o alcalde debe garantir, senón “incluso unha verdadeira participación dos concelleiros no Pleno e, por elo, supón unha extralimitación que non atopa amparo no ROF e que pode supoñer unha conculcación do dereito fundamental do artigo 23 da Constitución Española”.
Concretamente, o xulgado do Contencioso-Administrativo determinou que no pleno extraordinario do 26 de outubro de 2023 vulneráronse ditos dereitos e a súa participación política. E a sentenza recollía que “cando os concelleiros estean no uso da palabra, exercéndoa con corrección, sen afastarse da cuestión debatida e dentro do tempo razoable que se lle concedeu para participar no debate, non cabe que, en aras dunha suposta ou non ben entendida facultade de dirección ou de orde, o Alcalde-Presidente interrompa a quen lexitimamente e no exercicio da súa función representativa fai uso da súa quenda de palabra; pois tal comportamento non está ao amparo pola facultade da que dispón”.
A desestimación do recurso de apelación recolle, textualmente, que: “Non cabe aproveitar tal recurso para volver a reproducir os mesmos argumentos que se empregaron na instancia, xa que elo supón ignorar co recurso de apelación debe conter unha argumentación dirixida a combater os razoamentos xurídicos nos que se baseou a sentenza de instancia, pero non volver a propoñer outra vez o debate nos mesmos termos en que o foi en primeira instancia”.
Dende o grupo municipal socialista anuncian, ademais, que promoverán a reforma que entenden como necesaria e urxente do Regulamento Orgánico de Funcionamento (ROF) do Concello de Ourense neste mes de xuño.