O Xeodestino Terras de Celanova-Serra do Xurés promóvese con forza en Fitur
O Xeodestino Terras de Celanova-Serra do Xurés, conformado por un total de 15 concellos, foi presentado este mércores pola tarde en Fitur 2026 a través dun monográfico da publicación especializada de ámbito estatal Turismo Rural, cabeceira de referencia para este segmento.
Trátase dunha edición especial que ofrece unha completa guía de recursos, propostas e información útil para mergullarse neste destino fronteirizo, que comeza a tan só quince minutos da capital ourensá, e que foi presentada pola Deputación a través do Inorde. O seu presidente, Rosendo Fernández, destacou durante a súa intervención que “trátase de poñer en valor este territorio, terra de arraianos, de marcada personalidade, chea de recunchos por descubrir, patrimonio natural e histórico que hai que gozar con todos os sentidos”.
A publicación recolle desde os recursos imprescindibles de cada concello ata os segredos mellor gardados de Barbadás, Cartelle, A Merca, Gomesende, Ramirás, Celanova, A Bola, Padrenda, Quintela de Leirado, Verea, Bande, Lobeira, Entrimo, Muíños e Lobios, cun bo número de propostas adaptadas para todos os públicos: desde percorrer bosques máxicos e gozar de paisaxes de montaña ata visitar xacementos arqueolóxicos, mergullarnos en augas termais ou desfrutar dunha rica e variada gastronomía.
O Xeodestino Terras de Celanova-Serra do Xurés, conformado pola Reserva da Biosfera Xurés-Gêres e o Parque Natural Baixa Limia-Serra do Xurés, constitúe un territorio máxico, de bosques, montañas, auga e natureza, que o converten nun referente para os amantes do sendeirismo, dos deportes de montaña e do contacto coa natureza.
Ademais, grazas ás súas igrexas, capelas, petos de ánimas e cruceiros, aos seus castros ou ás súas grandes construcións, como o Mosteiro de Celanova ou a Canle do Ruca, unha das maiores obras de enxeñaría hidráulica de Galicia, preséntase como un destino para descubrir a pegada do ser humano ao longo do tempo.