O Ximnasia Burgas brilla no Nacional de Acrobática con cinco podios en Granada
O Club Ximnasia Burgas de Ourense asinou unha destacada actuación no Campionato de España de Ximnasia Acrobática celebrado en Granada, onde participaron 25 clubs e preto de 400 ximnastas de todo o país. O equipo ourensán regresou cun total de cinco medallas: tres ouros, unha prata e un bronce, ademais dun meritorio cuarto posto na categoría Infantil por equipos, un resultado especialmente salientable ao tratarse dun conxunto debutante a nivel estatal.
En total, o Burgas participou con 32 ximnastas: 12 en categoría Sénior, 13 en Júnior e 7 en Infantil. Os resultados máis destacados foron os títulos nacionais acadados polo equipo Sénior, o equipo Júnior e o trío Sénior formado por Claudia Pombar, Iria Do Nascimento e Alba Miranda. Ademais, os tríos júnior tamén subiron ao podio: Paula Fernández, Ana Lourido e Águeda Fontaíña foron subcampioas, mentres que Telma Veloso, Jimena Gómez e Miguel Valverde acadaron un terceiro posto.
Desde o club agradecen o recoñecemento recibido por parte de xuíces e adestradores doutras comunidades, que valoraron a calidade técnica e a execución das súas ximnastas. Uns eloxios que reforzan o traballo que o Ximnasia Burgas leva realizando dende hai anos para consolidarse entre os mellores clubs do panorama estatal nesta disciplina.