O xulgado declara nulo o cese do interventor do Concello de Ourense
O xulgado do social de Ourense vén de declarar nulo o cese do interventor do Concello e dictaminou que considera probada unha situación de “acoso no traballo” promovida polo alcalde da cidade, Gonzalo Pérez Jácome, a través de reiteradas manifestacións durante as sesións plenarias e as súas redes sociais. Ademais, a sentenza recolle que se indenmice cunha cantidade de 30.000 euros ao habilitado nacional e declara a nulidade do cese do seu posto.
Os socialistas piden a dimisión de Gonzalo Pérez Jácome
As reaccións por parte da oposición non se fixeron esperar. Desde o grupo municipal socialista sinalan que “a sentenza recolle e tipifica unha conduta que ás e aos membros do grupo municipal socialista non nos resulta allea. O continuo abuso da súa posición con difamacións, calumnias e insultos que exceden, con moito, da crítica política e que so teñen como fin danar á persoa á que se dirixen, despreciala e desprestixiala, son unha constante no salón de plenos e no Concello de Ourense”, subliña a edil do PSdeG María Fernández Ojea.
O xuíz afirma, nesta liña, que o rexedor iniciou “unha campaña de desprestixio” do interventor municipal “que non tiña outra finalidade que xustificar ante a opinión pública o futuro cese do seu posto por resultar un funcionario incómodo” e que o apartou dos seus labores malia a existir un informe do Ministerio de Facenda “que se opón radicalmente a elo”. Así mesmo, sinala o maxistrado que se trata dunha actuación “completamente ilegal pola falta de competencia do alcalde, conforme á normativa vixente, para proceder ao cese do demandante”. Ante estas explicacións, dende o grupo socialista consideran que a dimisión de Gonzalo Pérez Jácome debería de producirse de xeito inmediato.
“Esta non é a primeira denuncia á que se enfronta o alcalde e o Concello de Ourense e reflicte, ao longo das súas 18 páxinas a situación tóxica e de perigo para a saúde mental e laboral das traballadoras e traballadores municipais, así como das e dos membros da Corporación”, recorda a edil socialista. Trátase da segunda sentenza que o goberno da terceira cidade de Galicia, baixo o bastón de mando de Jácome, acumula por un delito de acoso laboral logo de que a xefa da Policía Local, María Barrera, levase ao xulgado á Administración e se dictaminase outra indemnización de 30.000 euros.
Así as cousas, dende o grupo socialista consideran que os feitos que se relatan no dictame son de “extrema gravidade e ademáis reiterativos”. E que o rexedor “lonxe de por fin a unha conduta non só reprobable, senón ilegal, a incrementa a diario danando a integridade da institución á que representa e xerando un clima de toxicidade” nunha contorna na que el é o xefe de persoal.
O BNG lembra que esta é a segunda sentencia que condena ao Concello por acoso
Desde o BNG lembran que xa tiñan que advertido que o cese "non tiña base legal pois fóra nomeado por concurso e non por libre designación e que en realidade, obedecía non a cuestións técnicas senón que estabamos diante dunha persecución e caza de bruxas contra todos aqueles funcionarios que simplemente fan o seu traballo con obxectividade e rigor e non son dóciles aos intereses da alcaldía”.
Para o BNG, o acontecido resposta á “incapacidade manifesta de Jácome, quen busca permanentemente culpables ante a insostible situación económica na que ten sumido ao Concello”, e engade, “o acontecido é gravísimo pois o que pretendía o Goberno Local era cesar á persoa encargada da fiscalizar a acción económica do Concello, un Concello, insistimos, sumido nunha grave situación económica que veremos agravada nos vindeiros meses”.
Luís Seara chama a atención sobre o feito de que “estamos diante da segunda sentenza que condena ao Concello por acoso, logo da ditada no caso da Intendente-Xefa da Policía Local e que o obriga a ter que pagar unha indemnización de 30.000 euros que sairán dos petos da veciñanza. Jácome segue a pensar que xestionar o Concello de Ourense é como xestionar Jolper”.