Os comerciantes da Praza de Abastos denuncian que Jácome quere iniciar o seu traslado coas instalacións sen rematar
Os comerciantes da Praza de Abastos de Ourense expresan o seu rexeitamento tras o anuncio do alcalde, Gonzalo Pérez Jácome, que asegurou este martes que iniciará o traslado dos praceiros ao novo edificio “nos próximos días”.
Os comerciantes denuncian que o novo edificio está aínda “sen luz, sen auga, sen saídas de fume”. Sinalan que o alcalde pretende efectuar o seu traslado coas instalacións inacabadas e acúsano de rexeitar os cartos da Xunta para “mellorar unha obra que beneficia a toda a cidade e ao seu patrimonio”.
Pola súa banda, o alcalde elude responsabilidades pola tensión xurdida tras o fracaso das negociacións e acusa á Xunta de “enredar con negociacións a 3 bandas que só pretendían complicar e dilatar o traslado”. Asegura ademais que “nos próximos días se lle notificará á mercantil da praza que proceda ao necesario para o traslado ao edificio reformado, que xa está totalmente recepcionado” e di que os comerciantes “disporán duns meses para trasladarse e liberar así as instalacións actuais no parque da Alameda”.