Actualidade

Advirten de que a medida anunciada polo Concello, que prevé o desaloxo da Alameda en 30 días, podería supoñer o fin “dun dos emblemas da nosa cidade”

O conflito entre o Concello e os comerciantes da Praza de Abastos número 1 de Ourense suma un novo capítulo despois de que este xoves o consistorio anunciase a decisión da Xunta de Goberno Local de desaloxar os praceiros do edificio provisional da Alameda nun prazo de 30 días.

Tras coñecer a decisión, os comerciantes emitiron un comunicado no que instan os grupos da oposición a intervir para frear a medida do alcalde, Gonzalo Pérez Jácome. Aseguran que Partido Popular, PSdeG e BNG “poden salvar a Praza e rematar con esta loucura”, e sosteñen que se trata “dunha cuestión de vontade política, de amor por esta cidade e de respecto pola cidadanía”.

No seu escrito, os comerciantes advirten de que esta situación “delicada e incerta” podería supoñer o fin “dun dos emblemas da nosa cidade”. “Unhas festas low cost e uns ascensores e rampas que se avarian cada dous por tres non valen tanto como todo o que estamos perdendo”, sinalan, criticando con dureza o clima político municipal motivado polo alcalde, que describen como marcado “pola mediocridade, o deterioro, as faltas de respecto, as mentiras e o acoso”. A cidadanía, engaden, “non ten por que seguir vendo como todo se destrúe” e subliñan que a situación “pode mellorar a partir de mañá se os partidos da oposición se poñen de acordo”.

Os máis de 200 traballadores do mercado agradeceron tamén o apoio veciñal “por permitírmonos estar tantos anos ao voso servizo” e lembran que o asunto está xudicializado, polo que confían “en que a xustiza poña as cousas no seu sitio”.