Os deportistas do club Artai de Ourense destacan no Campionato de España de Kuoshu-Kungfu por parellas
O Pavillón Municipal de Villar de Olalla, en Cuenca, acolleu o pasado sábado 20 de decembro o Campionato de España de Kuoshu-Kungfu por parellas, unha cita que reuniu preto de 200 competidores de distintos puntos do Estado e que contou coa participación da Federación Galega de Kungfu.
Dentro da selección galega tomou parte unha ampla representación do club Escolas Deportivas Artai de Ourense, con cinco parellas de deportistas que acadaron destacados resultados na competición.
Na categoría Júnior Marrón-Negro, Javier Armesto Gálvez e Javier Rodríguez Meigide proclamáronse campións de España, logrando a medalla de ouro. Pola súa banda, na categoría Júnior Verde-Azul, Daniel Díaz Yebra e Izan Campos Alonso conseguiron a medalla de bronce.
Tras estes bos resultados, os deportistas ourensáns regresan aos adestramentos centrados xa na preparación das próximas citas nacionais e internacionais previstas para o primeiro trimestre de 2026.