Os socialistas critican a decisión de Jácome de pechar os parques pola noite
Tras preguntar na Xunta de Área de Infraestruturas, Servizos Urbanos e Medio Ambiente, aprazada dende a semana pasada, o grupo municipal socialista sinala que a prohibición do horario dos parques “a partir das 22.00 horas en época escolar” non está avalada por ningún informe nin existe planificación sobre como se vai levar a cabo o seu cumprimento. “Van pechar os parques? Quen se encargará de controlar o horario de peche?”, pregúntase a edil do PSdeG Alba Iglesias.
E incide sobre esta medida en que o máis “alarmante” é que o executivo local non conta “cunha planificación” que apoie esta decisión e que a única solución que puxeron sobre a mesa é “colocar carteis cunha recomendación de non empregar estas instalacións nese horario”. Segundo o trasladado polo equipo de Jácome, darase aviso á policía en caso de incumprimento. “A que policía? Os efectivos da Local están baixo mínimos e ademais non teñen horas extra”, destaca a concelleira.
No que atinxe a outros asuntos, as socialistas lembran que “o Plan de Acción para o Clima e a Enerxía Sostible (PACES) leva paralizado e gardado nun caixón desde abril de 2022” e que tampouco hai previsións de “novas obras para rehabilitar e dignificar as instalacións do viveiro municipal”.
“Estamos ante un goberno que prioriza o cemento por riba das zonas verdes, cunha actitude de ‘arboricidio’ constante e unha xestión insostible”, remata a edil do PSdeG no Concello de Ourense ante un futuro que semella máis negro que verde.