Ourense acolle este sábado a décimo oitava edición dos Special Olympics Galicia 2024
A cidade de Ourense acollerá este sábado, 19 de outubro, a edición número 28 dos Xogos autonómicos de baloncesto para persoas con discapacidade intelectual de Special Olympics Galicia 2024. A actividade reunirá no Pazo Paco Paz un total de 165 xogadores acompañados de 35 adestradores procedentes de 9 entidades das 4 provincias galegas.
O salón de plenos do Concello de Ourense acolleu este xoves a presentación dos xogos, nun acto no que participaron Aníbal Pereira, tenente de alcalde e concelleiro de Deportes do Concello de Ourense; Patricia Torres, deputada provincial de Política Social, Conciliación e Envellecemento Activo; Manuel Pérez, xefe do Servizo Provincial de Deportes da Xunta; Isaac Otero, vogal da xunta directiva de Special Olympics Galicia, e Javier Rodríguez, presidente da asociación local ASPANAS, e dous deportistas da entidade que participarán nestes xogos.
En total son 9 as asociacións participantes, das cales 4 proveñen da provincia de Ourense (Aspanas, As Burgas e ADO de Ourense, e Asfaval do Barco), 3 de Lugo (San Vicente de Paul de Lugo, CAPD Sarria e Prodeme de Monforte), 1 da Coruña (Apader de Cedeira) e 1 de Pontevedra (San Francisco de Vigo). A asociación anfitrioa, ASPANAS, participa con 15 xogadores e 4 adestradores.
A actividade comezará ás 10.45 horas co desfile dos deportistas. Posteriormente un atleta da asociación ASPANAS lerá o lema dos deportistas de Special Olympics “Quero gañar, máis se non o consigo, deixádeme ser valente no intento”. Unha vez rematado o desfile procederase á inauguración oficial dos Xogos por parte do grupo de autoridades.
A competición, con diferentes niveis e probas, desenvolverase de 12.00 a 14.30 e de 16.00 a 19.00 horas, para rematar a continuación co acto de clausura.