Actualidade

O Entroido de Ourense entra na súa recta final cunha xornada marcada pola música das charangas, a actuación da Orquestra Mondragón & Javier Gurruchaga e sesións de DJ na Alameda, Santa Eufemia e no Correxidor

Ourense continúa este luns coas celebracións do Entroido con actividades musicais e festivas que se prolongarán desde o mediodía ata ben entrada a madrugada. Desde as 12:00 horas e ata as 3:00 da mañá, diferentes charangas percorrerán o Casco Vello, comezando coa sesión vermú e mantendo a animación durante toda a xornada.

Ás 17:00 horas terá lugar unha sesión infantil na Praza Maior, que combinará maquillaxe e un concerto con Uxía Lambona. Ás 19:00 horas actuará o grupo Los Coleguitas na Praza de Santa Eufemia, seguido ás 21:00 horas polo Trío Somoza na mesma praza.

Xa pola noite, ás 23:59 horas, a Orquestra Mondragón & Javier Gurruchaga actuará na Praza Maior, mentres que na Alameda comezará unha sesión de DJ a Gramola con Groove Amigos, Marcos Gramola e Jennifer Cach. Ás 23:00 horas haberá sesión de DJ na Praza de Santa Eufemia, e ás 00:30 horas continuará a música na Praza Correxidor.

Os festexos provocarán cortes de tráfico ás 19:15 horas no percorrido do desfile de Frei Canedo, que afectará á Ponte Romana, á avenida das Caldas, a Eulogio Gómez Franqueira e a Xesús Pousa. No que respecta ao tramo da rúa do Progreso, permitirase novamente a circulación por Parada Justel ata as 22:00 horas, nas mesmas condicións que o sábado. Ademais, manteranse as restricións no centro histórico pola animación musical.