Ourense da luz verde ao Parque Canedo
![Proxecto do Parque Canedo](https://ourensexa.com/wp-content/uploads/2024/07/Proxecto-do-Parque-Canedo.png)
Cos votos a favor de Democracia Ourensana e a abstención de PP, PSdeG-PSOE e BNG, o Goberno municipal sacou adiante esta mañá no pleno ordinario correspondente ao mes de agosto a proposta de autorización dos límites ao gasto plurianual establecidos no artigo 174.3 do Texto refundido da Lei reguladora das facendas locais na contratación conxunta da redacción de proxecto, dirección facultativa e execución das obras de construcción e urbanización do Parque Canedo.
A Xunta de Goberno Local do Concello de Ourense adxudicou o pasado 9 de xullo o contrato para redactar o proxecto e executar as obras de construción do parque Canedo, que dotará a cidade dun grande espazo de lecer, con piscina, zonas verdes e un aparcamento soterrado con 350 prazas. Será “o maior parque que se vai construír en Ourense”, explicaba entón o alcalde Gonzalo Pérez Jácome, quen subliñou que os novos equipamentos que se executarán “van dotar dunha calidade de vida tremenda a toda a veciñanza do barrio da Ponte, e por extensión de toda a cidade, que se beneficiarán dos novos servizos, ademais de revalorizar as vivendas da zona”.
O proxecto do parque Canedo prevé o acondicionamento de espazos libres, cun gran parque, un aparcamento público soterrado con 350 prazas de estacionamento e unha piscina, entre outros equipamentos, no solo urbano 32, zona 2 do Plan de Urbanismo de 1986. Trátase do interior do rueiro formado polas rúas San Rosendo, San Froilán, Avenida das Caldas, Avenida de Basilio Álvarez, Victoria Kent e Xesús Pousa Rodríguez, no barrio da Ponte.
A intervención prevé urbanizar o espazo público, creando unha ampla zona verde para desfrute da poboación, con servizos públicos que permitan satisfacer as necesidades lúdicas da veciñanza, e un grande aparcamento subterráneo que dea servizo ao novo espazo e ao barrio no que se atopa.
O goberno municipal prevé que o proxecto técnico estea rematado no mes de novembro ou decembro deste ano, e que a obra poida estar finalizada en decembro de 2026. Destaca o alcalde o aparcamento con 350 prazas “fundamental para o barrio da Ponte, nas proximidades da estación de tren e da praza de abastos da Ponte que abrirá en breve”, ou a piscina de verán, “que será tan grande como a de Oira”.
O proxecto está financiado parcialmente con fondos procedentes do Plan de Recuperación, Transformación e Resiliencia, financiado pola Unión Europea a través do Fondo Europeo de Recuperación Next Generation EU, ao abeiro do programa de axudas a municipios para a implantación de zonas de baixas emisións e a transformación dixital e sostible do transporte urbano (aprobado pola Orde TMA/892/2021, do 17 de agosto), código de actuación P09_L2_20220929-1 (Expte. nº 2022040924). A subvención está destinada á construción do aparcamento disuasorio e ascende a 549.727,64 euros.
O contrato, que inclúe a redacción do proxecto, a execución das obras e a dirección facultativa para a construción e urbanización do denominado Parque Canedo adxudícase á empresa Petrolam Infraestructuras SL, que presentou a oferta coa mellor relación calidade-prezo, por un importe total de 7.817.881,54 euros, IVE engadido.