Deportes

Ourense gañou cinco das oito categorías da competición absoluta, que se sumaron ás dúas medallas de prata de Miguel Pardavila e Leire Carrera e ao bronce de Rodrigo Álvarez

Campionato Galego de Jiu Jitsu, Ourense

Este domingo, 23 de febreiro, o Pavillón Anexo de Os Remedios acolleu o Campionato Galego de Jiu Jitsu masculino e feminino, unha competición na que a provincia presentou máis de un centenar de loitadores en diferentes modalidades e categorías.

O campionato estivo patrocinado polo Consello Municipal de Deportes e organizado polo departamento de Jiu Jitsu e a delegación ourensá da Federación Galega de Judo e Deportes Asociados. Foi a cuarta ocasión consecutiva que se celebrou en Ourense e a organización logrou, unha vez máis, un ambiente festivo e moi deportivo.

Para un mellor desenvolvemento do evento, a organización dividiu o torneo en dúas partes: as competicións de formación e promesas –entre as 10:30 e as 13:00 horas– e a competición absoluta –a partir das 16:30 horas.

No que respecta á competición absoluta, Ourense gañou cinco das oito categorías en disputa. David Rodríguez logrou o ouro en Loita (-56 quilos), Benjamín Junior en Loita (-77) e Yago-Nguyen Rodríguez en Loita (-94), mentres que Guillermo Arenas completou un dobrete en Loita e Ne Waza (-69).
A estas vitorias sumáronse as dúas medallas de prata de Miguel Pardavila (Loita e Ne Waza -69), Leire Carrera (Loita -63) e o bronce de Rodrigo Álvarez (Loita -77).

As categorías en disputa, ademais das xa clásicas de Loita sénior masculina e feminina Absoluta, cadete e júnior, Dúo masculino e feminino e Ne Waza (loita restrinxida ao chan), incluíron, por terceira vez en Ourense, as de formación, que abranguen as categorías Promesas A (nados entre 2019 e 2021), Promesas B (2016 a 2018), C (2013 a 2015) e D (2010 a 2013), todas en modalidade Ne Waza.

Así, o campionato foi a primeira experiencia competitiva para moitos jiujitsukas ourensáns. Para o seleccionador galego e subcampión do mundo Felipe Iglesias, o evento tivo un dobre obxectivo. “Nas categorías de formación, seguir promocionando esta modalidade e que os nenos gocen. E este ano engadimos, ademais de máis participantes ourensáns, novos jiujitsukas doutras partes de Galicia”. Para Iglesias, o evento foi un éxito “de participación e desenvolvemento, cun gran número de nenos en categorías de formación”. No que respecta á categoría absoluta, a convocatoria para o campionato de España “elaborarase coa suma deste torneo máis o traballo realizado durante toda a tempada”.