Ourense recibirá 22 millóns de euros para catro proxectos do Plan EDIL financiados con fondos europeos
A Delegación do Goberno en Galicia confirmou a asignación de fondos europeos do Plan EDIL para proxectos de desenvolvemento sostible na provincia de Ourense, cun total de 22 millóns de euros distribuídos en catro iniciativas.
Na categoría de cidades grandes, o Concello de Ourense recibe unha senda FEDER de 8.730.304 euros. Mentres, na categoría de áreas funcionais, destacan tres asociacións de Concellos. Dúas delas teñen como entidade solicitante á Deputación de Ourense, obtendo cada unha 4.365.152 euros.
Unha está liderada por Barbadás e inclúe os municipios de San Cibrao das Viñas e Pereiro de Aguiar. A outra, encabezada polo Barco de Valdeorras, aglutina a A Rúa, A Veiga, Carballeda de Valdeorras, O Bolo, Petín e Rubiá. Ademais, a asociación formada por Verín, Cualedro, Monterrei, Oímbra, Laza, Vilardevós, Castrelo de Val, A Mezquita, Riós e A Gudiña tamén recibirá 4.365.152 euros.
Estes proxectos forman parte dun total de 28 iniciativas aprobadas en Galicia, que beneficiarán a 54 municipios co obxectivo de promover o desenvolvemento sostible desde unha perspectiva medioambiental, económica e social.
A convocatoria, enmarcada no Fondo Europeo de Desenvolvemento Rexional (FEDER) para o período 2021-2027, asignou 1.774 millóns de euros a 242 proxectos en toda España, mobilizando máis de 2.500 millóns de investimento público até 2029 en 971 municipios, maioritariamente con menos de 10.000 habitantes. Segundo destacou o Ministerio de Facenda, a dotación representa un incremento do 30% nos fondos e un aumento do 40% no número de proxectos financiados respecto á anterior convocatoria 2014-2020, multiplicándose por catro o número de municipios beneficiados.
Para acceder ás subvencións, as entidades locais debían presentar unha Estratexia de Desenvolvemento Integrado Local (EDIL) que identificase os principais retos sociais, económicos, ambientais ou demográficos e propoñer un modelo de actuación integrado. A partir dela, presentouse un Plan de Actuación Integrado (PAI) que inclúe o programa de implementación, o detalle presupostario e os resultados previstos.
Os proxectos aprobados abordarán máis de 40 ámbitos de intervención, como a dixitalización e dinamización económica local, eficiencia enerxética, prevención do cambio climático, economía circular, recursos hídricos, mobilidade urbana sostible, inclusión social ou patrimonio urbano, cultural e turístico. A execución das actuacións poderase prolongar até 2029.