Ourense recibirá á Selección Española de Hockey Sala no marco do Torneo IV Nacións
O Pavillón dos Remedios de Ourense acollerá esta semana os encontros da Selección Española de hóckey sala, dentro do Torneo IV Nacións, unha cita internacional que servirá como preparación para o Campionato de Europa que se celebrará en Heidelberg a comezos de xaneiro. O evento conta coa colaboración do Concello de Ourense e da Federación Galega de Hóckey.
A cidade foi escollida como sede destas xornadas de traballo do combinado nacional, que se medirá ás seleccións de Italia, Portugal e Suíza no Anexo do Pavillón dos Remedios.
A competición comezará o domingo 28 de decembro coa disputa do encontro entre España e Italia ás 11.00 horas. Ese mesmo día, tras o primeiro partido da selección española, celebrarase un clinic gratuíto dirixido a nenos e nenas, no que poderán coñecer de preto o hóckey sala e compartir a experiencia cos xogadores do equipo nacional. A xornada do domingo completarase co partido entre Portugal e Suíza, previsto para as 14.00 horas.
O luns 29 de decembro continuará a competición cun novo encontro da selección española, que se enfrontará a Suíza ás 11.00 horas. Ao longo do día tamén se disputarán os partidos entre Italia e Portugal, ás 12.30 horas, Suíza e Italia, ás 17.30 horas, e Portugal e España, que pechará a xornada ás 19.00 horas. O torneo rematará o martes 30 de decembro coa celebración do partido polo terceiro e cuarto posto ás 9.00 horas e coa final ás 11.00 horas, tras a cal terá lugar a entrega de premios.
Desde a Concellería de Deportes sinalan que a cesión das instalacións dos Remedios responde ao obxectivo de apoiar o traballo das federacións e ofrecer á veciñanza a posibilidade de desfrutar de hóckey de nivel internacional sen saír da cidade. Pola súa banda, a Federación Galega de Hóckey destacou a boa disposición do Concello e a coordinación dos aspectos loxísticos necesarios para o correcto desenvolvemento do torneo en Ourense.