Ourense recupera poboación desde 2022 grazas á inmigración
A provincia experimentou un crecemento demográfico desde o ano 2022, poñendo fin a unha década de descenso continuo. Así o manifestou este venres, Día Mundial da Poboación, o subdelegado do Goberno en Ourense durante a súa visita á oficina provincial do Instituto Nacional de Estatística (INE), onde comentou coa súa delegación os datos recentes sobre a evolución da poboación.
Eladio Santos explicou que na provincia se observaba un descenso continuado da poboación desde hai moitos anos, máis acusado entre o 2010 e o 2020, e non se produciu un cambio de tendencia ata 2022, cando se acadou a cifra mínima de 304.280 habitantes na provincia. Nos anos 2023 e 2024 apareceron lixeiros incrementos na poboación, que tamén continuarán neste ano.
O subdelegado indicou que neste incremento tivo moito que ver a cidade de Ourense, xa que no ano 2003 a poboación do concello era de 109.475 habitantes (a súa cifra máis alta) e desde ese ano foi seguindo una tendencia negativa que salvo algunha excepción no ano 2010 e no ano 2020, se mantivo ata o ano 2022, cando acadou a cifra mais baixa: 103.756 habitantes. A partir dese ano obsérvase un cambio de tendencia que se mantivo no ano 2024 (cun total de 104.725 habitantes) e previsiblemente se manterá neste ano 2025.
Así, Santos incidiu en que o saldo vexetativo é negativo (4.759 falecidos e 1.339 nacementos en 2023) e o aumento da poboación ten que ver coa chegada de persoas estranxeiras, que representan actualmente o 7,07% do total provincial e o 18,39% dos habitantes da capital, fronte ao 5,04% e ao 13,92%, respectivamente, do ano 2022. “A inmigración é un factor clave para frear o despoboamento e, por iso, tal día como hoxe, celebramos con estas cifras unha esperanza de futuro para unha provincia que quere seguir viva, puxante e con capacidade de crecemento”, remarcou.
O subdelegado concretou que os inmigrantes máis novos proceden de Etiopía e Vietnam cunha media de idade de 20 anos, mentres que os inmigrantes de maior idade proceden de Iraq, Corea e Portugal, cunha idade media de 54 anos, aínda que o maior número de persoas inmigrantes procede de Venezuela cunha idade media de 41 anos. “Estas persoas atopan en Ourense un lugar onde construír o seu proxecto de vida, polo que quero reafirmar o compromiso do Goberno de España cunha política migratoria ordenada, segura e solidaria”, resaltou.
Respecto a outros indicadores demográficos, Eladio Santos apuntou que a pesar do incremento de poboación estranxeira a provincia segue a ter unha poboación envellecida, cun 32% de maiores de 64 anos, fronte ao 20% a nivel nacional. Como dato positivo, o subdelegado sinalou que a esperanza de vida ao nacer pasou desde principios de século de preto de 80 anos a 84 na actualidade. “Esta realidade revela como fundamental o incremento das pensións realizado por este Goberno”, aclarou.
Finalmente, Santos agradeceu “o continuo e rigoroso traballo” que fan os empregados e empregadas do INE “para proporcionar unha radiografía precisa da sociedade”. “O voso labor constitúe unha ferramenta fundamental para tomar decisións de calado dun xeito responsable”, sostivo