Pereiro de Aguiar encara a fase final da rehabilitación da casa de Ben-Cho-Shey
O Concello do Pereiro de Aguiar afronta a fase final das obras de rehabilitación da casa de Ben-Cho-Shey, situada no lugar de Caspiñón, co obxectivo de abrir o inmoble como Casa-Museo durante este verán.
Tras as actuacións iniciais realizadas nunha primeira fase, os traballos céntranse agora na rehabilitación integral do edificio, unha intervención que conta cun orzamento de 220.000 euros.
O proxecto desenvólvese grazas a un convenio de colaboración coa Xunta de Galicia e permitirá converter a antiga vivenda nun espazo dedicado á memoria e á cultura. A futura Casa-Museo terá un dobre obxectivo: por unha banda, render homenaxe aos mestres rurais, poñendo en valor o seu papel na educación e na vida das aldeas; e, pola outra, difundir a obra de Ben-Cho-Shey, destacando especialmente a súa vinculación co municipio e a súa coñecida obra Santa Marta de Moreiras. Monografía dunha parroquia ourensán.
Segundo o Concello, os prazos de execución avanzan segundo o previsto e espérase que as obras conclúan este mesmo verán, momento no que se presentará e abrirá ao público a exposición museística deseñada para promover e dar a coñecer a figura deste referente cultural.