Rafael Villarino retira a súa candidatura á Secretaría Xeral do PSdeG de Ourense
O actual secretario xeral do PSdeG-PSOE de Ourense e senador Rafael Rodríguez Villarino, anunciou hoxe que retira a súa candidatura para liderar o partido na provincia “despois de analizar o escenario das primarias provinciais e compartir opinións sobre o futuro político do socialismo ourensán con moitas compañeiras e compañeiros”.
Una decisión, sinala, que “debe ser o limiar dunha alternativa socialista innovadora, crible e apaixonante para a nosa terra”, sinalou.
Neste senso, Villarino manifestou a súa disposición para “dar paso á candidatura que mellor represente a competencia, a renovación e a frescura de ideas e programas no seo do partido”, sen descoidar “os principios éticos, a lealdade e a integridade que sementan confianza e impulsan a acción política cara o ben común, protexendo ás siglas de intereses individuais ou de faccións minoritarias”.
Rafa Villarino recorda que “no pasado, puxen o meu liderado electoral a dispor para facilitar un goberno municipal á altura do concello de Ourense”, e “agora retiro a miña candidatura no partido coa esperanza de que agrome unha iniciativa política da que medren a xustiza social, a igualdade, a liberdade e o compromiso co servizo público que definen as nosas siglas”.
Finalmente, o Secretario Provincial do PSdeG-PSOE en funcións agradece o apoio que lle brindaron ao longo destes anos a militancia ourensá e as persoas que integraron as diversas Comisións Executivas Provinciais, formulando cara o proceso que está en curso o desexo de que “a creatividade e o esforzo da socialdemocracia ourensá forxen proxectos políticos que eleven a prosperidade do noso territorio”, concluíu.
Dúas candidaturas
Tras a retirada de Villarino, os candidatos á dirixir o partido na provincia son o actual voceiro na Deputación e alcalde de Taboadela, Álvaro Vila, pertencente á chamada “Terceira Vía”, e a alcaldesa da Pobra de Trives, Patricia Domínguez, Barja, que contaría co aval da executiva galega liderada por José Ramón Gómez Besteiro, da que forma parte como Secretaria de Emprendemento.