Rematan as obras da Senda do Barbaña na Avenida de Pardo de Cela
As obras da Senda do Barbaña na avenida de Pardo de Cela chegaron ao seu fin este xoves. O delegado territorial da Xunta en Ourense, Manuel Pardo, visitou esta mañá a zona xunto con técnicos da Axencia Galega de Infraestruturas para supervisar o remate dos traballos, que se enmarcan na actuación global que o Goberno galego executa na cidade.
Pardo destacou que esta intervención ten unha gran relevancia “por tratarse dunha das principais vías de entrada e saída da cidade”, ademais de coincidir co trazado do Camiño de Santiago na Vía da Prata, nas inmediacións da Ponte Vella e dentro do contorno protexido do Ben de Interese Cultural (BIC). “Tivéronse en conta o tránsito de peregrinos nesta antesala da Ponte Vella, na marxe esquerda do río Miño, e por tanto, dentro do BIC do devandito monumento”, sinalou.
O obxectivo principal dos traballos centrouse en mellorar a seguridade viaria e peonil, creando unha ampla superficie que permita realizar cruces en distintas direccións con garantías. Para iso, coordináronse os semáforos da zona do Pavillón Municipal dos Remedios e do Colexio Salesianos, e incorporouse sinalización podotáctil, novo marcado viario e sinalización horizontal nos pasos de peóns e nos carrís de circulación.
A obra forma parte do Eixo de Mobilidade Peonil e Ciclista de Ourense, que conectará puntos clave como a avenida das Caldas, a Ponte Romana, o paseo do Barbaña, Expourense e o Pazo dos Deportes Paco Paz, ao longo dun percorrido norte-sur de catro quilómetros.
As actuacións fináncianse a través dos fondos europeos Next Generation, dentro dos proxectos que a Xunta impulsa para fomentar a mobilidade sustentable e reducir as emisións urbanas nas cidades galegas.