San Cibrao das Viñas aprobou o orzamento máis alto da súa historia, con 8 millóns de euros
San Cibrao das Viñas aprobou no pleno municipal o orzamento para o ano 2026, que alcanza a cifra récord de 8 millóns de euros, a cantidade máis alta na historia do municipio. Este orzamento, sinalan desde o Goberno municipal, está orientado a mellorar a calidade de vida da veciñanza e a impulsar proxectos importantes para a localidade.
Entre os puntos destacados, o orzamento destina máis de 1 millón de euros a reforzar os servizos sociais, o Servizo de Atención Familiar (SAF) e as políticas de conciliación. Ademais, prevénse investimentos por riba do millón de euros para impulsar a transformación do municipio.
Por cuarto ano consecutivo, o Concello mantén conxelados todos os impostos, taxas e prezos públicos, evitando así incrementar a carga económica sobre as familias. A situación financeira, sinalan, continúa sendo saudable, cunha débeda cero que garante a sustentabilidade económica.
Outra das novidades para 2026 é a apertura do novo consultorio médico en Reboredo, que se suma ás iniciativas para mellorar os servizos de saúde na comunidade.