Turoperadores internacionais coñecen a Vía da Prata ao seu paso por Ourense
O presidente do Inorde, Rosendo Fernández, recibiu este sábado na escalinata da Catedral de Ourense aos turoperadores que participan no fam trip organizado polo Instituto Ourensán de Desenvolvemento Económico en colaboración con Fairway, co obxectivo de dar a coñecer os atractivos turísticos, patrimoniais e naturais da Vía da Prata ao seu paso pola provincia.
Durante o encontro, os profesionais do sector expresaron a súa “grata sorpresa” ante un itinerario que, segundo recoñeceron, moitos descoñecían, e destacaron a riqueza patrimonial e a diversidade de recursos turísticos que ofrece esta ruta xacobea.
Esta acción inscríbese no Plan de Dinamización da Vía da Prata–Camiño Mozárabe da Deputación de Ourense, que busca promover o territorio a través da experiencia directa dos visitantes profesionais.
A viaxe, iniciada o pasado xoves 6 de novembro, reúne a turoperadores e xornalistas especializados procedentes de Estados Unidos, Brasil, Indonesia, Sudáfrica e España, que están a coñecer de primeira man a calidade da oferta de aloxamento, gastronomía e servizos turísticos da zona.
Durante o percorrido visitaron algúns dos principais referentes patrimoniais da provincia, como Santa María de Mixós, a Fortaleza de Monterrei, a Colexiata de Xunqueira de Ambía, a Igrexa de Santiago de Allariz, o museo de Arte Sacra de Santa Clara, o Mosteiro de San Salvador, a Capela de San Miguel de Celanova, o Pazo de San Damián e a propia Catedral de Ourense. Pola tarde, a ruta continuará cara o Mosteiro de Oseira e o templo da Vera Cruz.
Ademais, os participantes realizaron pequenas andainas por variantes do Camiño e tiveron a oportunidade de degustar produtos enogastronómicos locais nos distintos municipios polos que discorre a Vía da Prata, outro dos principais atractivos desta experiencia de promoción turística.