Unanimidade no pleno contra os ataques de Pérez Jácome aos medios de comunicación
No pleno ordinario do Concello de Ourense celebrado esta mañá aprobouse por unanimidade unha moción presentada polo grupo municipal do PSdeG que defende a liberdade de prensa, o dereito á información e o respecto institucional cara aos profesionais da comunicación. “Nos últimos anos, dende que o alcalde ocupa a cadeira de autoridade máxima desta cidade, estamos afeitos a presenciar como restrinxe dereitos básicos que os e as ourensás xa tiñan adquiridos, entre eles o de acceso a unha información plural e libre”, sinalou a portavoz socialista, Natalia González.
A edil destacou tamén que “estamos acostumados a que se ampare na escusa de que algo non é competencia estritamente municipal para botar por terra calquera idea ou iniciativa que mellore a vida de todos e todas as que aínda resistimos en Ourense”. Reprochou ademais a frecuente resposta do goberno local cando se escoita que “algo non se pode facer porque é responsabilidade da Xunta de Galicia ou do Goberno de Pedro Sánchez”.
Natalia González referiuse directamente ás actuacións do alcalde, Gonzalo Pérez Jácome, especialmente ao seu recente anuncio de limitar a só cinco minutos o tempo que os fotógrafos dispoñen para realizar instantáneas ao comezo dos plenos, subliñando que “para interferir nun dereito que aparece recollido no artigo 20 da Constitución Española, que recoñece e protexe a liberdade de expresión, que todas as persoas poidan comunicar ou recibir libremente información veraz por calquera medio de difusión e que prohibe a censura previa, para aí si ten autoridade Gonzalo Pérez Jácome”.
A moción, que contou co apoio de PP e BNG, insta ao goberno municipal a garantir que todas as comunicacións institucionais (roldas de prensa, anuncios, declaracións, actos e convocatorias) se realicen a través das canles oficiais do Concello de Ourense, co acceso libre dos medios e garantindo sempre a posibilidade de preguntas. Tamén pide ao alcalde que respecte escrupulosamente a liberdade de prensa e o pluralismo informativo, absterse de calquera comportamento intimidatorio ou despectivo que interfira no labor dos xornalistas e fotógrafos.
“Nós traemos esta moción porque a política e o xornalismo que nacen por vocación comparten similitudes coas que non podemos máis que sentirnos identificados. Cando o que se persegue é protexer e defender a democracia e a liberdade con maiúsculas, ás veces hai que asumir compromisos que poden resultar incómodos: preguntar onde non queren que preguntes, investigar onde moitos preferirían que reinase o silencio e contar o que outros tratan de ocultar. Defender a liberdade de prensa é, en esencia, defender a quen se dedica a buscar e explicar eses feitos aínda nas circunstancias máis difíciles”, destacou González.
Ademais, a moción esixe que calquera comparecencia institucional estea claramente separada da actividade privada do alcalde como prestador de servizos audiovisuais, para evitar que Auria TV substitúa ou condicione a comunicación municipal. Tamén reclaman que Pérez Jácome pida desculpas públicas polo seu comportamento e se retracte das decisións arbitrarias que limitaron o acceso dos medios e profesionais aos órganos públicos.
Na mesma sesión, os grupos da oposición apoiaron outra iniciativa do PSdeG para promover a cubrición dos parques infantís e espazos de lecer municipais, unha medida que xa funciona con éxito en cidades como Ferrol, Allariz ou Irún. Segundo a portavoz socialista, “os parques cubertos, ademais de protexer das inclemencias meteorolóxicas, permiten mellorar a accesibilidade universal e asegurar o goce dos espazos públicos por parte de todas as persoas”.
No texto aprobado recóllese a necesidade de realizar un inventario das zonas de xogo infantil que poderían adaptarse para esta medida, e de redactar e contratar o primeiro parque infantil cuberto da cidade nun prazo máximo dun ano, preferentemente nun barrio con maior demanda. Ademais, instan a abrir un proceso participativo onde familias, ANPAS e asociacións poidan aportar propostas sobre localización e deseño.