400 persoas percorreron as rúas da Valenzá na III Carreira pola Igualdade de Barbadás
As rúas da Valenzá enchéronse este domingo de cor rosa coa celebración da III Carreira pola Igualdade e Contra a Violencia, organizada pola Concellería de Igualdade do Concello de Barbadás. A cita deportiva acadou nesta edición unha cifra récord de participación, con 400 persoas inscritas.
A carreira comezou ás 11.00 horas na Glorieta da Familia e percorreu varias das principais rúas da localidade, nun ambiente marcado pola reivindicación da igualdade entre homes e mulleres e pola sensibilización contra a violencia.
Antes da saída, o alcalde de Barbadás, Xosé Carlos Valcárcel, xunto co tenente de alcalde e concelleiro de Igualdade, Daniel Rey, e Silvia Arce, referente do deporte feminino no municipio, dirixíronse aos participantes para agradecer a súa presenza e destacar a importancia de seguir avanzando cara a unha igualdade real en todos os ámbitos da sociedade.
A organización contou cun amplo dispositivo de seguridade para garantir o correcto desenvolvemento da proba, no que colaboraron efectivos da Policía Local, Garda Civil e Protección Civil de Barbadás, así como agrupacións de Protección Civil doutros concellos da provincia.