A Biblioteca Municipal de Barbadás pon en marcha unha campaña de fomento da lectura en galego
A Biblioteca Municipal de Barbadás vén de poñer en marcha unha campaña de promoción da lectura en galego. Por cada préstamo que se faga de libros escritos en lingua galega, a Biblioteca regalará un exemplar da obra ‘Cousas’ de Castelao, edición especial “Os quinquilláns”.
A obra é unha adaptación para a escena, pensada para públicos novos, dun dos textos clásicos da literatura galega contemporánea. As estampas de Castelao, combinación maxistral de relato e ilustración, serven de base para un espectáculo teatral distinto, explican dende a Biblioteca.
A campaña estará aberta a todos os cidadáns ata fin de existencias, co obxectivo de achegar os libros escritos en galego a toda a poboación e fomentar a súa lectura, especialmente entre os máis novos.