A Deputación esixirá á Xunta que asuma as competencias na financiación do Servizo de Axuda no Fogar
O Grupo Provincial Socialista acadou o compromiso do pleno da Deputación de Ourense para esixir do goberno autonómico a “correcta asunción das súas competencias, que inclúen un financiamento acaído coa realidade do Servizo de Axuda no Fogar (SAF)”. Tal e como destacou o voceiro socialista, Álvaro Vila, “os concellos que prestamos este servizo vemos en risco a nosa sustentabilidade ao ter que asumir unha competencia impropia que debería prestar directamente a Xunta de Galicia”.
Para Vila, “o SAF é un servizo capital en Ourense, que cada vez é máis demandado debido ás particulares condicións sociodemográficas da nosa provincia, debendo os municipios asumir importantes cargas, que non cesan de aumentar e hipotecan o seu futuro económico”. “Hai pequenos concellos do noso rural para os cales o servizo deveu extremadamente oneroso, superando mesmo ao gasto en limpeza viaria e recollida do lixo”, dixo Vila.
Nalgúns municipios o SAF representa xa un de cada tres euros dispoñibles para gasto corrente, o cal se ve agravado coas novas disposicións que reducen o copagamento a asumir polos usuarios do servizo e que debe ser sufragado pola Administración. “Os socialistas non podemos quedarnos de brazos cruzados mentres a Xunta, que ten as competencias, mira cara outro lado, resultando en último termo prexudicadas as persoas dependentes”, sentenza o voceiro socialista.
Porén, co voto en contra do PP e a abstención de BNG e DO, a proposta socialista para que a Deputación asuma parte dos custos do SAF dos concellos de Ourense non saíu adiante. “Nos consideramos que mentres a Xunta non actúa, a Deputación ben podería contribuír ao mantemento e mellora dun servizo esencial para o benestar social da provincia”, considera o deputado socialista. A iniciativa socialista contemplaba a posta en marcha de liñas de financiación provincial para o SAF, a dotación de medios aos equipos de valoración de dependencia para reducir as listas de agarda e mellorar a prestación do servizo.
Axudas para o sector gandeiro
O pleno da Deputación de Ourense aprobou por unanimidade a proposta socialista para poñer en marcha un programa de axudas dirixidas aos gandeiros afectados pola Enfermidade Hemorráxica Epizoótica (EHE) “con vistas a paliar as perdas das explotacións e garantir a estabilidade do sector”. “Por mor da tardanza da Xunta en reaccionar e do limitado dos subsidios, que non cobren as perdas reais, a Deputación ten que actuar para dotar de garantías ás moitas familias que dependen da actividade neste ramo”, dixo a deputada socialista Marina Vaz.
Segundo Vaz, “os gandeiros apenas chegan a recibir a axuda dos servizos veterinarios públicos, que son nomeadamente escasos na provincia de Ourense, non contando tampouco cun laboratorio de sanidade animal, como si teñen o resto de provincias galegas”, exhortando á Deputación para que a Consellería de Medio Rural dispoña en Ourense alomenos dos mesmos recursos cos que contan o resto de provincias galegas.
A EHE está a provocar grandes perdas nas granxas de vacún de Ourense, nomeadamente por mor de consultas veterinarias, aplicación de medicamentos, traballos de desinfección, vacinas, mortes de animais adultos, abortos e descenso na rendibilidade das reses. “Entrementres, a Deputación ten que actuar porque está en xogo a propia supervivencia das explotacións, das que dependen tantos fogares na nosa provincia!”, conclúe Vaz.