A Deputación fai balance do ano 2024 cunha aposta récord pola mellora das estradas provinciais
A Deputación de Ourense presentou o balance das actuacións realizadas en 2024 na súa rede viaria provincial, destacando unha aposta histórica pola conservación e mellora das estradas. Ao longo do ano, executáronse máis de 40 proxectos, que incluíron traballos de mantemento, melloras de seguridade viaria e a renovación de tramos con calzada insuficiente.
O 90% do investimento destinouse a conservación ordinaria, con tarefas como limpeza de marxes, renovación de sinalización e sistemas de contención, e actuacións en drenaxes e muros de contención. Tamén se levaron a cabo proxectos integrais para mellorar a seguridade viaria, incluíndo a creación de sendas peonís e medidas redutoras de velocidade en travesías.
A cooperación cos concellos intensificouse, atendendo 32 solicitudes de colaboración en 23 entidades locais, principalmente para reparación de vías municipais. Ademais, a Área de Infraestruturas mantivo a axilidade na tramitación de 1.208 expedientes de autorización e 178 relacionados con melloras en seguridade viaria, resoltos en menos de 90 días.
O Plan de Vialidade Invernal segue a garantir a seguridade en 1.000 quilómetros da rede provincial, con máis de 2.000 toneladas de sal e maquinaria especializada dispoñibles para loitar contra o xeo e a neve.
Con un investimento de 7 millóns de euros en 2024, practicamente o dobre que no ano anterior, e un aumento ata os 10,5 millóns previstos para 2025, a Deputación reafirma o seu compromiso cunha rede viaria máis segura e funcional para a veciñanza.