A mostra ‘O herbario de Rosalía’ xa pode visitarse en Allariz
A mostra ‘O Herbario de Rosalía’ abriu as súas portas na Casa da Cultura de Allariz con motivo do Día de Rosalía, que se conmemora o 23 de febreiro. A exposición explora preto de 150 plantas e flores citadas na obra da autora e estará aberta ata o vindeiro 28 de febreiro en horario de mañá e de tarde, de 12.00 a 14.00 horas e de 16.00 a 18.30 horas.
A exposición é a primeira das actividades organizadas polo Concello de Allariz para homenaxear á autora. Desde hai dous anos, o Concello é mecenas da Fundación Rosalía de Castro, colaborando activamente na conservación e divulgación do seu legado, un compromiso que se reflicte nunha programación diversa que inclúe exposicións, obradoiros, degustacións e actividades educativas e sociais.
Outras actividades
Para continuar co programa de actividades do Día de Rosalía en Allariz, en colaboración co CEIP Padre Feijoo, desenvolverase a actividade "Rosalía Cativa", dirixida a nenos e nenas de 1º e 2º de primaria. Esta iniciativa incluirá sesións de contacontos, obradoiros de papiroflexia e unha actividade especial sobre a orixe das fabas utilizadas no tradicional Caldo de Gloria.
Desde a área de Benestar Social, a técnica de maiores integrará a figura de Rosalía de Castro nas actividades de Arte e Creatividade, Estimulación Cognitiva e Recuperación da Memoria Comunitaria. Durante a semana, as persoas participantes realizarán diversas dinámicas e obradoiros inspirados na escritora galega.
A área de Promoción Económica, en colaboración coa hostalería local, celebrará o Día de Rosalía co tradicional Caldo de Gloria. Do 21 ao 23 de febreiro, doce establecementos de Allariz ofrecerán este prato inspirado no poema "Miña casiña, meu lar", onde Rosalía describe a preparación dun caldo humilde. Os locais participantes estarán identificados cun vinilo coa frase "Aquí hai Caldo de Gloria". Os establecementos participantes ofrecerán Caldo de Gloria ou ben como tapa ou incluíndo no menú da fin de semana.
Como incentivo, todas as persoas que degusten o Caldo de Gloria nos establecementos participantes poderán participar no sorteo dunha fin de semana en Padrón, visitando a Casa de Rosalía. Para inscribirse, será necesario escanear un código QR dispoñible nos establecementos, cubrir un formulario cos datos persoais e achegar unha foto dunha papeleta entregada no local (consultar bases de participación).
Ademais, o Mercado da Reserva ofrecerá unha degustación de Caldo de Gloria na mañá do sábado 20 de febreiro, da man de Moixo en horario de apertura do Mercado.
Este ano, a iniciativa ampliase á Escola Infantil "A Galiña Azul" de Allariz, que, xunto co CEIP Padre Feijoo, incluirá no seu menú do venres 21 de febreiro o Caldo de Gloria. Ambos centros recibirán manteis individuais de papel co poema de Rosalía, ao igual ca hostalería participante no Caldo de Gloria, grazas á colaboración da Fundación Rosalía de Castro.
Desta maneira, o Concello de Allariz reitera o seu compromiso coa difusión da obra e do legado de Rosalía de Castro, promovendo actividades culturais, educativas e gastronómicas que poñen en valor a figura da escritora entre a veciñanza.