A Semana Santa ao vivo regresa a Allariz do 17 ao 20 de abril
A Semana Santa ao Vivo chega a Allariz cunha proposta cultural e lúdica que converterá as rúas do centro histórico nun escenario . Do 17 ao 20 de abril, a veciñanza e as persoas visitantes poderán gozar dunha ampla programación que inclúe música de rúa, espectáculos infantís, roteiros guiados e mercados de produtos locais, nunha combinación perfecta de cultura, natureza e entretemento.
Na mañá de hoxe, Cristina Cid e María López, alcaldesa de Allariz e concelleira de Promoción Económica, Comercio e Turismo, presentaron a programación para a Semana Santa ao Vivo deste 2025. A alcaldesa destacou que esta iniciativa marca o inicio da tempada estival en Allariz, proporcionando actividades culturais e de lecer ao aire libre que melloran a calidade de vida da veciñanza e contribúen á dinamización económica local, especialmente para o sector comercial.
Música ao Vivo nas rúas de Allariz
A música será a gran protagonista desta Semana Santa, cunha selección de actuacións que encherán de ritmo e cor as rúas de Allariz. Artistas e grupos recoñecidos como Aiani, Amorodous, Arroxo, Deuce, Erick Lepeich, Os Dous Porquinhos, Minguante, Denis Carballás e Terapia de Grupo ofrecerán concertos en dous pases diarios: de 12.00 a 14.00 horas e de 18.00 a 20.00 horas. As actuacións desenvolveranse en distintos puntos do casco histórico con tres grupos por día, creando un ambiente festivo e dinámico ao longo de toda a xornada.
Espectáculos para o Público Infantil
A programación inclúe actividades pensadas especialmente para as crianzas, co obxectivo de fomentar a súa participación e diversión. O venres 18 de abril, ás 17.00 horas, na Praza de Abaixo, Inma Soto presentará Xela, aventura na fraga, unha historia chea de fantasía e emoción. O sábado 19, á mesma hora e no mesmo lugar, Cris Collazo ofrecerá Pepa a loba, un espectáculo de contacontos baseado no tradicional relato da lendaria bandoleira galega.
Mercado da Reserva da Biosfera
Para as persoas amantes da gastronomía e dos produtos autóctonos, o Mercado da Reserva da Biosfera será unha visita imprescindible. Celebrarase o venres 18 e o sábado 19 de abril, en horario de 10.00 a 14.00 horas, na Praza do Matadoiro. As persoas asistentes poderán descubrir e adquirir produtos ecolóxicos, artesanais e de proximidade, apoiando as iniciativas locais e sustentables.
Roteiros e Visitas Guiadas
A Semana Santa ao Vivo tamén ofrece unha excelente oportunidade para explorar a historia e a riqueza paisaxística de Allariz a través de visitas guiadas e roteiros temáticos:
- Roteiro Temático Allariz: 18 e 19 de abril, ás 17.00 horas., con saída desde a Oficina de Información Turística).
- Visitas Guiadas ao Casco Histórico: 17 de abril, ás 19.00 horas, con saída desde a Oficina de Información Turística.
- Roteiro Arqueolóxico de Armea e Igrexa Románica de Santa Mariña de Augas Santas: 17 e 19 de abril, ás 10:30 horas, con saída desde o aparcadoiro de Santa Mariña.
- Roteiro Arqueolóxico de Armea: 18 e 20 de abril, ás 11.00 horas, con saída desde o aparcadoiro de Santa Mariña.
- Visitas Guiadas á Granxa, Queixería e Ecoespazo de O Rexo (17, 18, 19 e 20 de abril, ás 11.30 horas, en O Rexo, con inscrición previa.
Todas estas visitas ou roteiros serán con inscrición previa en turismo@xeitura.com ou no 609 474 976, xa que as prazas son limitadas.
Ademais, os domingos pola mañá hai visitas guiadas á Asociación A.N.D.R.E.A. para grupos reducidos, con reserva previa, unha actividade ideal para coñecer máis de preto o labor desta entidade en favor do benestar animal. Para poñerse en contacto podes facelo por dúas vías, no 696 971 670 ou enviando un correo a andreaasociacion@gmail.com.
Museos Abertos
Os museos de Allariz tamén se suman á Semana Santa cun horario especial de apertura. O Museo da Moda de Allariz, o Museo Galego do Xoguete e o Museo do Coiro estarán dispoñibles os días 12, 13, 17, 18 e 19 de abril en horario de 10.00 a 14.00 e de 17.00 a 19.00 horas. Os días 14, 15, 16 e 20 de abril poderán visitarse de 10.00 a 14.00 horas.
A Semana Santa ao Vivo en Allariz é unha experiencia única que combina música, cultura, historia e tradición nun entorno incomparable. Unha cita imprescindible para quen busca gozar dunhas festas diferentes, cheas de propostas interesantes e abertas a todas as persoas.
