As caldas da Chavasqueira e do Muíño da Veiga non abrirán o 1 de abril
“As termas da Chavasqueira e do Muíño da Veiga abrirán ao público tan pronto cando o caudal do río Miño o permita”, aseguraban este venres dende o Goberno municipal de Ourense. O Concello
Segundo explican, o Concello “tiña prevista a súa entrada en servizo para o día 1 de abril, coa empresa que gañou a licitación para a xestión destas instalación”, algo que non vai suceder, segundo desprende a información achegada polo executivo, que asegura que “as crecidas do río Miño fan necesario levar a cabo traballos adicionais de acondicionamento, limpeza e desinfección destes espazos, que son precisos para que se poidan poñer á disposición do público nas condicións axeitadas, e cumprir os parámetros definidos pola normativa galega reguladora de espazos termais”.
No mesmo comunicado, o Concello afirma que ten previsto iniciar a execución destes traballos “tan pronto como sexa posible”, pero escusa especificar unha data concreta.
Unha situación que está a xerar un gran descontento entre os centos de usuarios destes espazos, que levan tempo denunciando o “desleixo” do alcalde de Ourense, Gonzalo Pérez Jácome, co termalismo público, cuestión que se agravou fai algúns meses, tras anunciar que piscina das Burgas non reabriría este ano e que a intención do goberno municipal é privatizala.
As críticas ante a política termal por parte do rexedor chegan tamén dende o PSdeG no Concello, que denunciou a “pésima xestión” do alcalde “en todos os eidos e, especialmente, no turismo que verá, previsiblemente, como comeza co 80% das instalacións termais inoperantes unha das tempadas que máis visitantes atrae a Ourense”.