Celanova conmemorará o Día da Muller coa ruta "Terra de Mestras"

As asociacións de Amas de Casa “Ilduara” e de Mulleres Rurais “San Rosendo” organizan o venres 7 de marzo, de 16:00 a 19:00 horas, unha ruta guiada baixo o lema "Celanova: Terra de Mestras", enmarcada na celebración do Día da Muller Traballadora. A actividade será dirixida pola Fundación Curros Enríquez e percorrerá distintos centros educativos da vila para poñer en valor o papel do ensino e das mestras ao longo da historia.

O itinerario, que non require inscrición previa, comezará no CPR Sagrado Corazón, onde se explicará o labor da comunidade de franciscanas, que en 1897 fundou unha Escola de Nenas que chegou a contar cun internado. Na actualidade, o centro é plurilingüe e ofrece ensino desde educación infantil ata secundaria.

A continuación, a ruta dirixirase ao IES Celanova Celso Emilio Ferreiro, situado no Mosteiro de San Salvador de Celanova, un espazo que ao longo dos séculos acolleu distintas iniciativas educativas, como as Escolas Pías, a escola de nenas e centros xestionados polos Agostiños e Salesianos. Tamén se lembrará o período no que acolleu o proxecto do Padre Silva, coñecido como a Cidade dos Rapaces.

O percorrido continuará ata o CEIP Curros Enríquez, que en 2025 cumpre 50 anos desde a súa apertura. Alí, docentes do centro explicarán a historia do colexio e a súa evolución ao longo do tempo. Durante o traxecto, lembraranse outros espazos que funcionaron como centros educativos na vila, como a Academia de Manuel Gago ou a escola primaria que ocupou o actual edificio dos xulgados no século XX.

A ruta finalizará na Casa dos Poetas, onde os asistentes poderán visitar a exposición do escultor Eduardo Rodríguez Osorio, con especial atención á sala dedicada ás maternidades. Ademais, ofrecerase unha merenda como peche da xornada.