Continúa a folga dos traballadores do outlet de Massímo Dutti en Allariz contra os despidos e os abusos laborais
Dende a CIG-Servizos de Ourense veñen tempo denunciando incumprimentos en materia salarial, establecidas tanto por convenio colectivo como por acordos internos, que os traballadores/as levan reclamando dende hai meses.
“A resposta da empresa foi non só non atender as súas demandas, senón que foron ‘castigados/as’ por reclamar os seus dereitos, despedindo inxustamente a un traballador, impoñendo unha sanción abusiva de 16 días sen emprego e soldo a outra traballadora e anunciando que se empregarán as gravacións do sistema de vixilancia recen instalado, colocadas incluso na sala de descanso, como proba para interpor posíbeis sancións”.
Na central sindical sinalan que Integratex, que conta con tres tendas en todo Galiza, presume de que máis do 90% dos seus empregados/as son persoas con discapacidade e que todos os beneficios obtidos pasan a reinvestirse na propia empresa co obxectivo de seguir fomentando o seu crecemento e a creación de emprego para este colectivo.
“Pero a realidade é ben distinta: en Massimo Dutti de Allariz os traballadores/as foron enganados/as, xa que motivo da reforma e ampliación da tenda hai un par de anos roubáronlles días de vacacións; non se lles recoñece a categoría profesional correspondente; e incumpren o convenio colectivo e un acordo de mellora salarial asinado entre as partes, algo que consideramos inadmisíbel por tratarse dun centro especial de emprego que ten anualmente uns beneficios desorbitados".
Diante disto, o cadro de persoal optou por convocar catro xornadas de folga que comezaron o pasado domingo e que continuarán hasta mañá, 19 de maio.