Derradeiros días para solicitar as axudas a deportistas individuais do Concello de Pereiro de Aguiar
O vindeiro luns 16 de febreiro remata o prazo para presentar solicitudes ás Axudas a Deportistas Individuais convocadas polo Concello de Pereiro de Aguiar dentro do “Plan Reactiva 2026”. Esta liña de apoio está destinada a recoñecer o esforzo dos atletas empadroados no municipio que acadaron méritos deportivos durante a tempada 2024-2025.
Estas axudas van dirixidas a deportistas maiores e menores de 18 anos que estean empadroados en Pereiro de Aguiar con, polo menos, un ano de antigüidade e que dispoñan dunha licencia federativa en vigor. Entre os criterios para optar á subvención atópanse logros como subir ao podio en campionatos provinciais, estar entre os 10 primeiros en competicións galegas ou entre os 15 primeiros en nacionais, entre outros.
O importe máximo que se poderá recibir é de 200 euros por deportista. As solicitudes poden presentarse no Rexistro Xeral do Concello ou de forma telemática a través da Sede Electrónica no sitio web oficial do Concello.
Ademais desta convocatoria, o Concello segue a apoiar ás familias numerosas con outras axudas, que xa beneficiaron a unha ducia de fogares cunha achega económica de 200 euros desde o pasado outubro.
Desde o Concello lembran a importancia de non deixar pasar o prazo para aproveitar estas iniciativas de apoio ao deporte e ás familias locais.