Actualidade | Concello

As mocións reclaman a ambiental do Couto de Celanova, o reforzo dos recursos públicos contra a violencia machista e o mantemento da xustiza de proximidade que garanta a protección das vítimas no rural

Iago Tabarés e Ernesta Seoane

O BNG de Celanova conseguiu o respaldo unánime da corporación municipal para tres mocións centradas na defensa do territorio, o reforzo das políticas contra a violencia machista e a necesidade de garantir unha xustiza de proximidade no ámbito da violencia sobre a muller.

A portavoz nacionalista, Ernesta Seoane, celebrou o resultado asegurando que “as nacionalistas enviamos desde Celanova unha mensaxe clara: imos defender o noso territorio, os dereitos das mulleres e uns servizos públicos que garantan igualdade e dignidade para toda a veciñanza”.

A primeira das iniciativas aborda a situación do Couto de Celanova, onde os ríos Arnoia e Ourille conforman un espazo de relevancia ambiental e patrimonial sometido, segundo explicou Seoane, a un deterioro progresivo. A edil advertiu de que “este patrimonio natural e etnográfico leva anos abandonado, sen mantemento e sen políticas de recuperación que garantan a súa conservación e o seu potencial social e económico”. Lembrou que a deterioración das presas, muíños, pasarelas e canles compromete tanto o valor histórico do lugar como o equilibrio ecolóxico, o estado da auga e as posibilidades de uso veciñal.

Seoane incidiu en que estes elementos seguen a cumprir funcións ambientais relevantes, especialmente en épocas de estiaxe, e poden servir de apoio na prevención de incendios. Por iso, reclamou que “é imprescindible que o Concello lidere as xestións e poña fin a décadas de abandono”.

A segunda moción aprobada fai referencia ao 25N e á necesidade de reforzar os recursos públicos destinados á loita contra a violencia machista. A portavoz afirmou que “negar a violencia machista é, en si mesma, unha forma de violencia, e a falta de recursos ou a súa privatización debilita o sistema que debe protexer ás mulleres”. Lembrou que a lei galega de 2007 foi pioneira, mais que continúa sen se desenvolver plenamente pola falta de compromiso político da Xunta.

Seoane destacou ademais o carácter “demoledor” do informe do Consello de Contas, que denuncia a redución de persoal especializado, a ausencia dun sistema público de atención directa e a privatización de servizos como os centros de crise. “Non podemos permitir que algo tan sensible como a atención á violencia sexual dependa de empresas multiservizo. Fan falta máis medios, máis profesionais e máis compromiso público”, concluíu. O pleno acordou tamén expresar o seu apoio ás mobilizacións do movemento feminista galego.

A terceira iniciativa aprobada alerta das consecuencias que, a xuízo do BNG, tería a decisión do Goberno do Estado de concentrar nunha única Sección de Violencia sobre a Muller en Ourense a xurisdición da maior parte da provincia. Seoane advertiu de que isto obrigaría as vítimas dos partidos xudiciais do interior, entre eles o de Celanova, a desprazarse á capital en momentos especialmente delicados.

A portavoz cualificou a proposta como “un novo golpe aos servizos públicos no rural e un risco evidente para a protección das vítimas, que verán como se lles complica o acceso á xustiza nun ámbito tan sensíbel”. Asegurou ademais que o baremo empregado polo Estado para xustificar a comarcalización está “obsoleto e non pode ser o criterio determinante cando estamos a falar de protección, acompañamento e atención ás mulleres vítimas de violencia”. Seoane criticou tamén a falta de reacción da Xunta e da Deputación de Ourense ante unha medida que, ao seu ver, pode deteriorar gravemente a atención prestada nos xulgados dos partidos xudiciais afectados.