O BNG de Ourense denuncia a “caótica e neglixente xestión económica do Goberno Jácome”
A Xunta de Goberno Local do Concello de Ourense deu conta eta mañá do Auto ditado polo Xulgado Contencioso-Administrativo número 2 de Ourense, na Execución Definitiva do Procedemento promovido por Autobuses Urbanos de Ourense S.L.
Nese auto ordénase literalmente “ao Concello de Ourense a que, de forma inmediata e, en todo caso, no prazo máximo dun mes, ao pago das cantidades fixadas nos autos de 31 de outubro e 26 de novembro de 2024, 30 de outubro de 2024 [...] así como requerir á administración demandada na persoa do seu Alcalde para que, no prazo de cinco días, proceda a identificar á autoridade ou autoridades responsables do cumprimento do fallo [...]”.
No BNG sinalan que dito Auto fai referencia á sentenza que obriga ao Concello ao pagamento de 16.661.861,77 euros á empresa concesionaria do Servizo de transporte público e dos cales 1.963.041,65 euros corresponden con xuros de mora. A formación nacionalista lembra que o pasado 15 de novembro de 2024, o Pleno da Corporación aprobaba unha modificación de crédito, a 25P/2024 “por ese importe e coa finalidade de facer fronte a dita sentenza”.
Para o portavoz do BNG Luís Seara, “o sorprendente é que aquel día o Goberno Local imploraba o apoio da Oposición para aprobar esta modificación e poder cumprir cunha sentenza xudicial acusando aos demais de que non facelo sería irresponsable” e engade, “agora atopámonos con que apenas catro meses despois, o Xulgado ten que requerilos para que paguen. Este feito revela a nula capacidade de xestión do actual Goberno Local, un Goberno que aproba modificacións de crédito, tarde, mal e arrastro e que logo é incapaz de executar”.
Luís Seara advirte que o máis grave do asunto é que “pese a ter asumido a sentenza e ter consignados os cartos a través dunha modificación de crédito, agora na proposta de resolución que vai á Xunta de Goberno Local, proponse recorrer en apelación o Auto que obriga ao pagamento”.
Seara ten claro que “estamos diante dunha manobra dilatoria pero que vai ter graves consecuencias para as arcas municipais pois de non gañar dita apelación, os xuro de mora, que a día de hoxe rozan os dous millóns de euros, veranse incrementados notablemente e todo por non saber xestionar e planificar”.
Con todo, o BNG denuncia a “caótica e neglixente xestión económica do Goberno Jácome”, xestión que para eles “está levando ao Concello a unha situación de colapso e parálise sen precedentes e con importantísimas cargas económicas que ímos ter que afrontar entre todas e todos”.