O BNG pide que sexa o propio Jácome o que pague o custo pola nova sentencia de acoso que condena ao Concello
Coñecida unha nova sentencia por acoso en contra do Concello de Ourense e, máis concretamente, do alcalde Gonzalo Pérez Jácome, nesta ocasión por acosar á persoa que ostentaba as competencias da xefatura do negociado de Comercio, desde o Grupo municipal do BNG sinalan que “estamos diante dunha sentenza contundente que revela, ao igual que as anteriores, cal é o proceder e o comportamento de quen exerce a máxima autoridade do Concello”.
Para o portavoz dos nacionalistas, Luís Seara, “Jácome aproveitase da súa posición de poder á fronte do Concello para, cual abusón de patio de colexio, menoscabar, insultar e acosar ás e aos traballadores municipais que non son funcionais aos seus intereses”.
No BNG lembran que esta non é a primeira sentenza por acoso á que ten que facer fronte o Concello de Ourense, pois “xa temos enriba da mesa as sentenzas á Intendente-xefa da Policía Local e ao Interventor municipal, sentenzas que, ao igual que esta, levan aparelladas cuantiosas cantidades económicas en concepto de indemnización, que teremos que pagar entre todas e todos”.
A formación nacionalista insiste na súa idea de que “sexa o propio Jácome quen pague, do seu propio peto, as cantidades fixadas polos tribunais. Xa non é de recibo que sexa a veciñanza no seu conxunto e as arcas municipais as que teñan que sufragar os seus excesos”.
Para Luís Seara, “esta sentenza, ao igual que as anteriores, revela o clima de traballo instalado no Concello desde a chegada de Jácome á alcaldía. Seis anos nos que se disparou a conflitividade laboral e as baixas”, e engade, “tampouco podemos esquecer os continuos deprezos públicos aos que somete ás e aos traballadores municipais, deixándoos nunha posición de vulnerabilidade diante da veciñanza”.
Por último, Luís Seara mira de esguello ao PP para lembrarlle que “foron eles os que auparon a Jácome á alcaldía en 2019 e en 2023. Son eles os que continuamente lle dan osíxeno para que poida seguir gobernando e son eles os que, pola mañá, maniféstanse ao carón das e dos traballadores dándolles ánimos e palmadiñas nas costas e, polas tardes, negocian o xeito de volver a entrar no Goberno Local”.