O Campus de Ourense acolleu esta semana o inicio dos Campionatos Galegos Universitarios de Natación
Este martes comezaron no campus de Ourense as probas da 27ª edición dos Campionatos Galegos Universitarios, da Secretaría Xeral para o Deporte da Xunta de Galicia.
A piscina universitaria de Ourense foi sede do Campionato Galego Universitario de Natación, no que participaron uns 70 deportistas federados das tres universidades galegas. Na clasificación xeral, a Universidade de Santiago de Compostela proclamouse vencedora con 207 puntos, seguida pola Universidade de Vigo con 201 puntos e a Universidade de A Coruña con 148 puntos.
O evento foi organizado pola Área de Benestar, Saúde e Deportes da Universidade de Vigo, e o seu obxectivo, ademais da competición, foi recoñecer e valorar o esforzo do alumnado universitario que compaxina os seus estudos co deporte de alto nivel. Desde a organización, destacaron o bo ambiente do campionato, que tamén permitiu que as delegacións das tres universidades compartisen unha xornada de convivencia. A participación neste evento permitiu aos deportistas seguir adestrando de cara a futuras competicións e lles abriu a porta para participar nos Campionatos de España de Natación Universitaria.
O programa incluíu probas de 50 e 100 metros en mariposa, espalda, braza e libre; 200 metros libres; 100 estilos, e relevos mixtos de estilos e libre. A delegación da Universidade de Vigo, a máis numerosa con 27 deportistas, contou coa participación de destacados nadadores como Mateo García, internacional con España en Augas Abertas, medallista nacional e récord galego; Eva Feijóo, velocista ourensá do grupo de adestramento no Centro de Tecnificación de Pontevedra; Sofía Carballo, récord galega en piscina olímpica en braza; e Naiara Eijo, Carla Faro e Antón Ares, que teñen marcas mínimas para participar nos campionatos de España. Entre os representantes da Universidade de Santiago de Compostela estiveron nomes como Manuel Pérez, medallista nacional, e deportistas habituais en competicións nacionais como Odei Arias, Carmen Blanco e Alexia Camba. Pola parte da Universidade de A Coruña, participaron nadadores como Mario Maneiros e Javier Pontón, así como nadadoras como Julia Rodríguez.
O evento concluíu cunha cerimonia de entrega de trofeos en 21 categorías, ademais das xerais, na que participaron Francisco Javier Rodríguez Rajo, vicerreitor do campus de Ourense; Manuel Pardo, delegado territorial en Ourense da Xunta de Galicia; Aníbal Pereira, tenente alcalde e concelleiro de Deportes; César Fernández, vicepresidente segundo da Deputación de Ourense; e Xabier Rial, director técnico da Área de Benestar, Saúde e Deporte da UVigo. Na súa intervención, o vicerreitor destacou a importancia do deporte e os seus valores na formación do alumnado universitario e felicitou aos participantes polo esforzo que realizan ao compaxinar a vida académica e deportiva, dando sempre o mellor de si mesmos en cada competición.
Nesta 27ª edición dos Campionatos Galegos Universitarios, na que participaron uns 600 deportistas das tres universidades galegas, a Universidade de Vigo será tamén a encargada de organizar o campionato de vela este xoves nas instalacións do Centro Galego de Vela en Vilagarcía de Arousa.