O CHUO lidera as listas de agarda en Galicia en atención cirúrxica e externa
A Área Sanitaria de Ourense, Verín e O Barco de Valdeorras lidera as listas de espera en Galicia tanto en atención cirúrxica como en consultas externas. Así o reflicten os datos publicados polo Sergas correspondentes a xuño de 2024, que penalizan especialmente ao Hospital Universitario de Ourense.
Deste xeito, os datos amosan que, en total, a Área Sanitaria de Ourense ten unha lista de espera de 81,8 días de media para atención cirúrxica. Dentro dela, o CHUO acumula os maiores atrasos, cunha media de 88,9 días, seguido do Hospital de Verín, con 42,2 días, e O Barco de Valdeorras, con 34,5. Por áreas, o servizo de Neurocirurxía é o máis afectado, cunha media de 154,1 días de espera.
En canto ás consultas con especialistas, os datos amosan que a Área Sanitaria de Ourense acumula unha media de 129,2 días de espera, mentres que a media galega sería de 71,6.
O CHUO volve ser unha vez máis o que acumula os maiores atrasos, cunha media de 141,8 días de espera, moi por diante de Verín (con 38,5) e O Barco (con 73,6).
En canto a especialidades, lideran as listas de espera o servizo de rehabilitación (317,5), oftalmoloxía (126,8) e obstetricia (126,8).