O Concello de Barbadás asegura que está a traballar no traslado da comandancia de Ourense á Valenzá
Este venres, no pleno extraordinario do Concello de Barbadás solicitado polo PP, o Goberno municipal de Barbadás confirmou que está a traballar coa Garda Civil para facer realidade o traslado da comandancia de Ourense á Valenzá.
O alcalde, Xosé Carlos Valcárcel, detallou os pasos dados nos últimos meses para lograr o traslado da sede do Instituto Armado, explicando que os técnicos da Garda Civil están avaliando a idoneidade dun solar propiedade do Concello de Barbadás, tal e como o trasladou Eladio Santos, subdelegado do Goberno, na Xunta Local de Seguridade deste mércores.
O Concello respondía desta forma ao PP, que o acusaba de non ter previsto ningún cuartel no concello “pese á inseguridade que denuncia a veciñanza”, e que incluso pedirá a dimisión do alcalde por este feito. Unha petición que fracasou cos votos en contra de DO e Partido Galego e a abstención do BNG.