O Concello de Ourense esixe á empresa adxudicataria das obras da Avenida de Portugal retomar os traballos
O Concello de Ourense notificou á empresa Opain que debe retomar as obras da Avenida de Portugal nun prazo de tres días, despois de que a empresa adxudicataria anunciase o pasado luns a suspensión dos traballos ante a “imposibilidade de manter a viabilidade financeira do proxecto ante o incumprimento dos compromisos de pago por parte da Administración local”.
Ademais de cuestións técnicas, a empresa sinala que o Concello de Ourense adebeda as facturas correspondentes aos meses de novembro e decembro de 2025 e ao mes de xaneiro de 2026, argumentando que a suma destes impagos fai inviable o mantemento dos subministracións, a maquinaria e o persoal.
Porén, para o alcalde de Ourense, Gonzalo Pérez Jácome, trátase “dun acto insólito” ao facerse pública a decisión a través dos medios de comunicación. Para o rexedor, “o normal, e obrigatorio, sería comunicalo ao Concello”. Ademais, insiste, “como indica a lei, debe comunicarse cun mes de antelación”.
Desde o Goberno municipal sinalan que, legalmente, requírense catro meses de impagos para xustificar unha paralización, circunstancia que aínda non se deu, e consideran que “resulta inxustificado que unha empresa do sector paralice un proxecto de 5.200.000 euros por un atraso de 400.000 euros”.
Ante esta situación, desde o Concello deron orde á empresa de retomar os traballos e aseguran que xa se ordenou a cada departamento que aboe as dúas facturas pendentes de novembro e decembro de 2025, mentres que a de xaneiro está seguindo, segundo palabras do alcalde, o seu curso habitual de contabilización.