O Concello de Ourense planea organizar un festival de música folk na cidade de cara a 2026
O Concello de Ourense reforzará a programación dos Maios 2026 cun festival de música folk. O alcalde de Ourense, Gonzalo Pérez Jácome, recibiu esta mañá no Concello a Manuel Brañas, artesán de instrumentos musicais e fundador do grupo Brañas Folk, para avanzar nesta iniciativa, que pretende dotar a cidade dun festival de música folk durante unha fin de semana.
Por vontade do Concello, o festival levarase a cabo durante a festividade dos Maios, coa finalidade de dotar dun atractivo engadido a esta celebración, que coincide tamén co Día da Nai, o primeiro domingo do mes de maio. A programación da edición dos Maios de 2025 está xa pechada, polo que a primeira edición do novo festival será en 2026. Dende hai 3 anos, sempre hai unha actuación de música folk na festa dos Maios.
O formato será un festival de 2 días: sábado e domingo, e contará coa participación de músicos de prestixio e un programa que integrará tamén actividades paralelas, para as que se valoran posibilidades como obradoiros de elaboración de instrumentos, conferencias ou concertos didácticos. O resultado será así unha programación de diferentes propostas que, sumadas ás incluídas na festa dos Maios, poderán propiciar tamén a afluencia turística á tradicional festa ourensá. “É un win win”, resumía ao remate da xuntanza o alcalde xa que a elección desta data reforzará a celebración da festa e suporá un atractivo tamén para o propio evento musical.
O Concello asumirá a organización do festival, para a que o goberno municipal agarda contar coa colaboración da Xunta de Galicia.