O grupo ourensán Amarillo Trece actúa este domingo no parque de Ribeira de Canedo
O grupo ourensán, Amarillo Trece, dará un concerto este venres no barrio pontino, dentro das actividades organizadas pola Asociación Frei Canedo para festexar o Entroido na Ponte. A actuación arrancará na carpa instalada no Parque Ribeira de Canedo, a partir das 23.30 horas.
Amarillo Trece presentouse o pasado 20 de abril no Rock Club de Ourense. O grupo está formado por Diego Domínguez, Marcos Ferreiro e Fabian Carreiro, tres ourensáns que contan cunha ampla experiencia musical que, logo dun traballo de máis dun ano, lograron compoñer os 13 temas que hoxe lles permiten subirse aos escenarios.
Ao contrario do que se poida pensar, o seu nome é toda unha declaración de positividade, afirman os tres integrantes. "Por unha parte, o amarelo é unha asociada á mala sorte e o color prohibido no mundo artístico, mentres que o trece é o número da mala sorte, pero a suma de dous negativos sempre dá un positivo e nós queremos ver ese lado máis optimista".
Na súa música hai amor e desamor, pero tamén hai crítica e desconformidade, "sempre acompañado dun toque para poder cantar e bailar", afirman. Unhas letras traballadas e un son fresco son os pilares do seu éxito, que se constatou tras o seu primeiro concerto, no que conseguiron esgotar as entradas. "O noso primeiro concerto foi unha grata experiencia, rodeados de xente que estaba con moitas ganas de descubrir o que facíamos. Foi unha experiencia moi positiva xa que a resposta do público foi a mellor que podíamos esperar, recibimos moitos comentarios positivos da xente e iso danos moito ánimo a continuar con este proxecto".
Preguntados polo seu característico estilo musical, os seus membros aseguran que non se definen dentro dun só estilo "xa que a variedade de gustos dentro da banda levounos a ter un son particular". "Temos moitas e variadas influencias cada un de nós, desde o pop dos 80/90, pasando polo mundo electrónico e mesmo clásicos do Rock ou Metal", explican. "Non creemos que teñamos que definirnos dentro dun só estilo. O publico defínenos e tenta clasificarnos pero nós non tratamos de definirnos e centrámonos mais en soar como nós mesmos, achegando cada un o seu granito de area, e iso e o que nos levou a ser Amarillo Trece".