Os socialistas ourensáns acusan ao alcalde de ser “incapaz de xestionar o Concello de Ourense”
Os socialistas do Concello de Ourense denuncian “as graves irregularidades nos procedementos administrativos do goberno de Democracia Orensana veñene de cobrarse unha nova vítima: a concesión do servizo de recollida de lixo e limpeza viaria”. Esta prestación, actualmente en precario e deficitaria con respecto aos estándares mínimos de eficiencia, xa non cubre sequera todos os barrios da cidade coa periodicidade debida, conta con colectores rotos e en situacións insalubres nalgúns casos e foi tumbado polo Tribunal de Contratación Administrativa de Galicia porque os pregos incumpren a legalidade.
“Unha concesión administrativa é un dos expedientes máis complexos que pode tramitar un concello e máis se se trata de servizos esenciais que supoñen unha elevada contía económica como é o caso do lixo, o transporte urbano ou a auga. Estos procedementos esixen un traballo previo e vontade política coa que é preciso actuar de xeito terriblemente escrupuloso polas análises ás que están sometidos por parte de organismos externos”, explica a socialista.
Tamén destacan dende o grupo do PSdeG que o Concello non está a pagar os servizos públicos, porque ao permanecer en precario son reparados por intervención, e supón que as empresas reclamarán, ou teñen reclamados xa, os prezos de mercado, non os de contrato pola súa precariedade, así como os intereses. “Non estamos a falar dunha obra que se complica ou se queda sen crédito orzamentario cara final de ano. Estamos a afirmar que non pagamos por ter alumeado público, servizo de recollida de lixo, abastecemento e saneamento de auga ou transporte urbano. A débeda coas concesionarias ascende hoxe en día a máis de 60 millóns de euros e o alcalde de Ourense non parece ter a iniciativa suficiente para solucionar esta situación. É máis, a súa ausencia de capacidade de xestión dificúltaa, se cabe, máis” afirma contundente a edil.
Nesta liña, as e os edís do grupo municipal do PSdeG inciden en que se as licitacións non están adaptadas a todos os procedementos legais non poderán saír adiante. E subliñan que o goberno de Democracia Orensana nunca tivo intención de “coñecer como funciona unha Administración pública” porque “o que realmente queren é que funcione como unha administración privada”.
“Dende o noso punto de vista súmanse dúas cuestións para que o executivo actual sexa incapaz de licitar unha concesión pública e de elaborar un orzamento, básico para poder xestionar unha administración local: dunha banda, o seu profundo desprezo pola administración pública; e, doutra, a súa ausencia de vontade política. Todas as decisións que toma o alcalde son en clave electoral”, insiste a socialista.
Así as cousas, recordan que en 5 anos de mandato Gonzalo Pérez Jácome foi incapaz de adoptar unha soa decisón política porque “teñen un custe e iso non entra nos seus plans”. “As súas decisións son exclusivamente electoralistas e iso leva a unha parálise e a unha hipoteca económica a longo prazo, que xa supón unha lousa a data de hoxe”, argumenta contundente.
Esta nova anulación súmase, por outra banda, a anterior do Tribunal de Contratación Administrativa de Galicia que deixou sen efecto os pregos do transporte público e o Concello non terá novas liñas ata, polo menos, mediados do ano 2026. “Os veciños e as veciñas de Ourense non disporán, xa non dun servizo de transporte urbano actualizado, senón da posilibilidade de empregar o transporte público nunhas condicións mínimas nas que poidan saber a que hora pasa un autobús” subliñan as socialistas.