Ourense acolle a II Gala Benéfica "Por Eles TEA"
O Auditorio municipal de Ourense acolle este sábado 13 de abril, as 18.30 horas, a segunda Gala Benéfica "Por Eles TEA".
A gala ten como finalidade “visibilizar o autismo, sensibilizar a sociedade e axudar cos proxectos que pretende desenvolver a asociación”, segundo explica María Losada, vicepresidenta da asociación. Será “un espectáculo precioso de música e de danza, no que contaremos algunhas cousiñas acerca do autismo e da nosa asociación para que toda a sociedade ourensá nos coñeza mellor”. Esta é a segunda edición desta iniciativa que, logo da exitosa experiencia inicial do ano pasado no Teatro Principal, trasládase este ano a un espazo de maior capacidade, como é o auditorio.
O espectáculo contará coa participación da Escola Estudio Repenica, a banda Tango y Cash, as escolas de baile Catro Pasos e Tics e o coro universitario e estará presentada polo actor e escritor Pablo Piñeiro.