Sobreseída provisionalmente unha denuncia contra o alcalde de Ourense por inxurias
Decrétase o sobresemento provisional da causa aberta logo de que un funcionario do Concello denunciase o alcalde de Ourense, Gonzalo P. Jácome por inxurias, e procédese ao arquivo destas acusacións.
A conduta acreditada en autos non é susceptible de cualificarse de inxuria grave, segundo recolle o auto ditado polo Xulgado de Instrución número 2 de Ourense.
Este sobresemento é a última peza que faltaba para o arquivo total do proceso, explican dende o Concello, xa que o pasado mes de febreiro a Audiencia Provincial de Ourense arquivou a outra parte da causa, ao desestimar definitivamente o recurso de apelación interposto polo querelante polos delitos de revelación de segredos e contra a integridade moral, sendo ese auto firme e contra o que xa non cabe recurso ningún por parte do traballador.
En relación coa denuncia por inxurias, logo do sobresemento provisional da causa, ábrese un prazo de tres días hábiles para presentar un recurso de reforma ao que se lle poderá engadir un recurso de apelación para o que disporá de cinco días hábiles máis.