Asociacións

A actividade serviu para dar a coñecer os programas e servizos de apoio e prevención que ofrece a entidade contra o cancro

O Espazo Veciñal Casa da Maxia, nova sede da Agrupación Miño, acolleu un faladoiro sobre saúde en colaboración coa Asociación Española Contra o Cancro (AECC) de Ourense.

A actividade enmárcase dentro da programación comunitaria da agrupación e serviu tanto para dinamizar este novo espazo como para dar a coñecer os programas e servizos de apoio e prevención que ofrece a entidade contra o cancro.

Esta colaboración entre a AECC de Ourense e a Agrupación Miño permitirá ademais levar accións de sensibilización e prevención a centros sociais da periferia e do ámbito rural, que se coordinarán coas asociacións veciñais federadas.