A Asociación Bicos de Papel leva a súa labor solidaria ao hospital de Ourense antes da súa gala benéfica de setembro
A Asociación Bicos de Papel instalou este domingo unha mesa informativa no Hospital Universitario de Ourense, coa que buscou achegarse a pacientes, familiares e persoal sanitario para explicar de primeira man o traballo que desenvolve en favor dos nenos e nenas con cancro e das súas familias.
Esta acción enmárcase na promoción da II Gala Solidaria que a entidade ten previsto celebrar o vindeiro sábado 5 de setembro no Auditorio Municipal de Ourense. O evento contará con distintas actuacións e actividades pensadas para todos os públicos, de xeito que poidan gozar da xornada tanto os máis pequenos coma o resto da familia.
A presenza no hospital serviu tamén para lembrar a labor que a asociación realiza no día a día, atendendo actualmente a tres familias da provincia de Ourense que teñen menores ao seu cargo en tratamento oncohematolóxico. A estas familias, Bicos de Papel ofrécelles aloxamento na súa vivenda de acollida, un recurso pensado para acompañalas durante o proceso de tratamento dos seus fillos e fillas, aliviando así parte da carga que supón desprazarse e permanecer fóra do seu lugar de orixe mentres dura a enfermidade.
Con iniciativas coma esta mesa informativa e a propia gala solidaria, a entidade pretende dar maior visibilidade á súa labor social, sensibilizar a cidadanía sobre a realidade que viven estas familias e, ao mesmo tempo, recadar o apoio e os fondos necesarios para poder seguir prestando este acompañamento no futuro.