A Asociación Diabética Auria e a Agrupación Miño promove hábitos saudables entre a veciñanza de Reza
OurenseXa
Arredor dunha vintena de persoas participaron nunha xornada sobre alimentación, saúde e diabetes
19 Apr 2026
O centro social da Asociación Veciñal Quince de Agosto de Reza acolleu esta semana un obradoiro centrado nos hábitos de vida saudable, a alimentación e a diabetes. A actividade enmárcase nunha iniciativa conxunta da Asociación Diabética Auria e da Agrupación Miño.
O obxectivo desta proposta é sensibilizar á poboación sobre a diabetes, ao tempo que se fomenta a adopción de hábitos de vida saudable e un envellecemento activo, especialmente no ámbito das asociacións veciñais da periferia e do medio rural.
Arredor dunha vintena de persoas participaron nesta actividade, que estivo aberta á veciñanza e que buscou reforzar a saúde comunitaria a través da información e da prevención.