A Banda de Gaitas de Cea abre matrícula para a súa escola infantil de gaita
A Banda de Gaitas de Cea abriu o prazo de inscrición para novo alumnado da súa escola infantil de gaitas, que comezará o seu terceiro curso o vindeiro mes de outubro. A iniciativa pretende seguir formando futuros músicos e conservar a tradición dunha das bandas con máis historia de Galicia, fundada en 1988.
Este verán, varios alumnos das primeiras promocións da escola puideron participar nun concerto xunto a Carlos Núñez, celebrado no Mosteiro de Oseira.
As clases estarán a cargo de profesorado especializado en gaita e percusión. Impartiranse como actividade extraescolar no colexio de Cea entre semana, e tamén as fins de semana no local social da asociación cultural. Entre os instrumentos que se poden aprender están a gaita, a pandeireta, o tambor, o timbal e o bombo.
Neste proceso formativo tamén participan antigos compoñentes da primeira etapa da banda, persoas que aprenderon música nas décadas dos oitenta e noventa e que agora acompañan ás novas xeracións.
Esta nova etapa permitiu reunir en Cea a intérpretes de distintas épocas arredor da música galega. Boa mostra diso é a Banda Interxeracional de Gaitas de Cea, integrada tanto por músicos veteranos coma polos novos talentos que se están a formar na escola.
Quen queira sumarse a este proxecto cultural pode solicitar máis información no correo electrónico bandadegaitasdecea@gmail.com. A convocatoria está aberta e non ten límite de idade.