A biblioteca de Maceda presenta a súa programación anual de clubs de lectura e actividades
A Biblioteca Pública Municipal Francisco Carballo de Maceda deu a coñecer a súa programación de actividades para este curso, cunha oferta variada pensada para públicos de diferentes idades e intereses, que combina a lectura, o xogo e os espazos de encontro social.
Entre as propostas semanais destaca 'Libronautas', dirixida ao público infantil, que se celebra todos os martes de 17.00 a 18.00 horas e busca achegar aos máis pequenos ao mundo da lectura a través de historias cheas de imaxinación. Para quen busca dar un paso máis nos seus hábitos lectores, a biblioteca organiza 'Letrásticas', os venres de 17.30 a 18.30 horas, centrada en relatos máis longos e intensos.
No apartado lúdico, a actividade 'Mesa Con-Partida' ofrece un espazo para o xogo de mesa en grupo, programada para os terceiros xoves de cada mes.
A programación tamén inclúe dous clubs de lectura para persoas adultas. O Club de Lectura de Maceda reúnese os primeiros venres de cada mes, ás 20.00 horas, como punto de encontro mensual para comentar lecturas e intercambiar opinións sobre novas voces literarias. Pola súa banda, o Club de Lectura Raiolas Ultravioleta, que se celebra os segundos xoves de mes ás 18.30 horas, propón un espazo de diálogo arredor da igualdade, a diversidade e a tolerancia a través dos libros.
Ademais destas citas periódicas, a biblioteca mantén aberto de luns a venres, de 17.00 a 20.00 horas, o espazo denominado 'A TaLERna', pensado como unha zona de uso libre onde se pode ler con tranquilidade, consultar a prensa, xogar a xogos de mesa, facer pasatempos ou conectarse á rede wifi gratuíta do centro.
Para máis información sobre calquera destas actividades, o centro habilitou o teléfono 988 463 374, dentro do seu horario de atención, de luns a venres de 17.00 a 20.00 horas.